​ ჩვენთვის უკვე კარგად ცნობილია რუსეთის დეზინფორმაციისა და პროპაგანდის მესიჯები, მისი ბასრი ძალის ის მეთოდები, რომელსაც აქტიურად იყენებს საქართველოზე. თუმცა, საქართველოს პოლიტიკურ არეალში კიდევ ერთი ავტორიტარული ქვეყანა გამოჩნდა, რომლის გავლენის მოპოვების მეთოდები საკმაოდ განსხვავდება რუსეთისგან და შესაძლოა ჩვენთვის ჯერ უცხოც კია - ეს ჩინეთია. ჩინეთი არის ავტორიტარული ძალა, რომელიც უპირისპირდება ევროპულ ღირებულებებს და იმ მსოფლიო წესრიგს, რომელიც დასავლეთმა შექმნა. ჩინეთთან მზარდი თანამშრომლობა შეიძლება გახდეს ევროინტეგრაციასა თუ სხვა დასავლელ პარტნიორებთან ურთიერთობაში ხელის შემშლელი. თუმცა, ამის მიუხედავად, პარტნიორობის გაღრმავების ინტერესები ჩვენი მთავრობის მხრიდან სულ უფრო იზრდება. 

​

 ჩინეთ-საქართველოს ურთიერთობა 2023 წლის 31 ივლისს ახალ ეტაპზე გადავიდა, გაფორმდა სტრატეგიული პარტნიორობის დოკუმენტი, რაც თანამშრომლობის გაფართოებას გულისხმობს 4 სფეროში: პოლიტიკურ, ეკონომიკურ კულტურულსა და საერთაშორისო ურთიერთობებში.  მოცემულ დოკუმენტის ერთ-ერთი მთავარი პრობლემა საქართველოს ტერიტორიული მთლიანობის საკითხია. დოკუმენტის პირველივე პუნქტში წერია, რომ მხარეები ადასტურებენ პატივისცემას ყველა ქვეყნის სუვერენიტეტის, დამოუკიდებლობისა და ტერიტორიულ მთლიანობასადმი, საუბარია ასევე, რომ საქართველო მხარს უჭერს ერთიანი ჩინეთის პრინციპს ანუ აღიარებს, რომ ტაივანი ჩინეთის ნაწილია. იმის მიუხედავად, რომ საქართველოს პრემიერ-მინისტრმა, ირაკლი კობახიძემ განმარტა: „ჩინეთი მყარად აღიარებს საქართველოს სუვერენიტეტს და ტერიტორიულ მთლიანობას“,  დოკუმენტში არაფერია ნათქვამი ამაზე.

​

 აღსანიშნავია ისიც, რომ ჩინეთი ჩვეულებრივ თავს იკავებს ან ეწინააღმდეგება გაეროს იმ რეზოლუციებს, რომელიც ეხება ოკუპირებულ ტერიტორიებს. ბოლო ასეთი რეზოლუცია გაერომ 8 ივნისს მიიღო, რომელიც აღიარებს საქართველოს ოკუპირებული რეგიონებიდან იძულებით გადაადგილებულ პირთა და დევნილთა დაბრუნებას თავიანთ სახლებში. ამ რეზოლუციისთვის ხმის მიცემაზე ჩინეთმა შეიკავა თავი. პრემიერ-მინისტრმა აღნიშნა, რომ გაერო-ს  ეს რეზოლუცია სუვერენიტეტსა და ოკუპირებულ ტერიტორიების აღიარებას არ ეხებოდა. პარლამენტსი თავჯდომარის, შალვა პაპუაშვილის განმარტებით, "ამ შემთხვევაში თავშეკავება მხარდაჭერის ტოლფასია".